14 yanvar kuni Yaponiya terma jamoasi O‘zbekistonga qarshi o‘yin oldidan BAAning Abu-Dabi shahrida mashg‘ulotlarni boshladi.

Xabaringiz bor, Yaponiya “F” guruhining bo‘lib o‘tgan ikki turida ham g‘alaba qozonib, 6 ochko bilan 2-o‘rinni egallab turibdi.

O‘zbekiston terma jamoasida ham xuddi shunday natija bo‘lib, ular faqat to‘plar nisbati bo‘yicha guruhda yetakchilikni qo‘lga olishgan. Endilikda 3-tur o‘yini guruhda kim yaqqol favorit ekanligini aniqlab beradi.

Mashg‘ulot mahalliy vaqt bilan 11:00 da boshlandi va 14:00 da yakuniga yetdi. Yaponiyaning Ummonga qarshi o‘yinni asosiy tarkibda o‘tkazgan futbolchilari tiklanish uchun mashg‘ulotda ishtirok etmadi.

Ummonga qarshi o‘yinda zahiradan maydonga tushgan Yosinori Muto (Nyukasl Yunayted) va Dzyunya Ito (Kashiva Reysol) esa ushbu mashg‘ulotda qatnashdi.

Yaponiyalik futbolchilar mashg‘ulotni jarima zarbalarini amalga oshirish, uzoq paslar va kuchli fitnes mashqlari bilan yakunlashdi.

Quyida axborot hamkorimiz “WorldNews” nashrining Yaponiya terma jamoasining O‘zbekistonga qarshi dastlabki mashg‘ulotidan tayyorlagan videolavhasini tomosha qilishingiz mumkin.