14 январь куни Япония терма жамоаси Ўзбекистонга қарши ўйин олдидан БААнинг Абу-Даби шаҳрида машғулотларни бошлади.

Хабарингиз бор, Япония “F” гуруҳининг бўлиб ўтган икки турида ҳам ғалаба қозониб, 6 очко билан 2-ўринни эгаллаб турибди.

Ўзбекистон терма жамоасида ҳам худди шундай натижа бўлиб, улар фақат тўплар нисбати бўйича гуруҳда етакчиликни қўлга олишган. Эндиликда 3-тур ўйини гуруҳда ким яққол фаворит эканлигини аниқлаб беради.

Машғулот маҳаллий вақт билан 11:00 да бошланди ва 14:00 да якунига етди. Япониянинг Уммонга қарши ўйинни асосий таркибда ўтказган футболчилари тикланиш учун машғулотда иштирок этмади.

Уммонга қарши ўйинда заҳирадан майдонга тушган Ёсинори Муто (Ньюкасл Юнайтед) ва Дзюня Ито (Кашива Рейсол) эса ушбу машғулотда қатнашди.

Япониялик футболчилар машғулотни жарима зарбаларини амалга ошириш, узоқ паслар ва кучли фитнес машқлари билан якунлашди.

Қуйида ахборот ҳамкоримиз “WorldNews” нашрининг Япония терма жамоасининг Ўзбекистонга қарши дастлабки машғулотидан тайёрлаган видеолавҳасини томоша қилишингиз мумкин.