Akmal Eshonxonov
Al-Ayn shahridan maxsus
Yaponiya terma jamoasi ertaga, 17 yanvar kuni Osiyo kubogi guruh bosqichining 3-turida O‘zbekistonga qarshi maydonga tushadi.
Bo‘lajak o‘yin oldidan Angliyaning “Sautgempton” klubi hamda Yaponiya termasi sardori Maya Yoshida O‘zbekistonga qarshi o‘yinda murabbiy yoshlarga e’tibor berishi kerakligini aytib o‘tdi.
“Albatta, O‘zbekistonga qarshi o‘yinda qanday natija qayd etishimiz bevosita murabbiyga bog‘liq. Chunki tarkibni u tanlaydi. Ikki o‘yinda ham g‘alaba qozondik. Uchinchi o‘yin qiyin bo‘ladi, balki murabbiy O‘zbekistonga qarshi yoshlarni maydonga tushirishi ham mumkin.
Osiyo kubogi musobaqasida yosh jamoadoshlarim ham o‘zlarini sinab ko‘rishlarini istardim. Bu turnir katta bozor va yoshlarga kelajakda yaxshi klublarda o‘ynashlari uchun katta imkoniyat. Ular shu yo‘l bilan terma jamoaning asosiy futbolchilariga ham aylanishlari mumkin.
Albatta, rasmiy uchrashuv bosimi o‘rtoqlik o‘yinidan umuman farq qiladi. Ammo men bu o‘yinda jamoa ichki muhitidagi ahillikni kuchaytirish uchun ham yoshlarga imkoniyat berish kerak deb o‘ylayman. Menimcha, bu bizga qo‘shimcha kuch beradi, shunday usul bilan jamoani to‘g‘ri yo‘lga to‘g‘irlash mumkin.
Eslatib o‘tamiz, 17 yanvar kuni Osiyo Kubogi guruh bosqichidan o‘rin olgan so‘nggi tur uchrashuvini O‘zbekiston milliy terma jamoasi Al-Ayn shahridagi "Xalifa bin Zayd" stadionida Yaponiyaga qarshi o‘tkazadi. Mazkur bahsni BAAlik hakam Muhammad Abdulla Hasan Muhammad boshqaradi.
