Ertaga, 17 yanvar kuni Yaponiya terma jamoasi Osiyo kubogi guruh bosqichi 3-turidan o‘rin olgan bahsda O‘zbekistonga qarshi maydonga tushadi. Mazkur o‘yin oldidan yaponiyaliklar hujumchisi Takumi Minamino bahs haqidagi fikrlari bilan qiziqdik.

“Avvalgi o‘yinda ko‘plab vaziyatlarni qo‘kka sovurdim. Ammo bundan tashvishlanmayman. Chunki gol urmagunimga qadar darvoza tomon zarba berishdan charchamayman. O‘tgan o‘yindan muhrlangan videotasmalarga qaraganimda, ko‘proq o‘ng burchakka intilganimni ko‘rdim. Umid qilamanki, O‘zbekistonga qarshi o‘yinda bunday xatolarga yo‘l qo‘ymayman. Chet elga 19 yoshimda ketganman. Oradan 4 yil o‘tdi. Vaqt tez o‘tyapti, ammo hozirgi holatimdan mamnun emasman. Kuchli futbolchi bo‘lish uchun yanada ko‘proq o‘z ustimda ishlashim kerak”, -deydi Minamino.

Ma’lumot o‘rnida, Minamino Avstriyaning “Red Bul Zalsburg” jamoasi a’zosi hisoblanadi.

Eslatib o‘tamiz, 17 yanvar kuni Osiyo Kubogi guruh bosqichidan o‘rin olgan so‘nggi tur uchrashuvini O‘zbekiston milliy terma jamoasi Al-Ayn shahridagi "Xalifa bin Zayd" stadionida Yaponiyaga qarshi o‘tkazadi. Mazkur bahsni BAAlik hakam Muhammad Abdulla Hasan Muhammad boshqaradi.

Ta’kidlab o‘tamiz, Minamino Ummon - Yaponiya uchrashuvida raqibni ushlab qolgani uchun hakam tomonidan sariq kartochka bilan jazolangan edi. Ushbu harakati uchun OFK futbolchini 5000 AQSH dollari miqdorida jarimaga tortdi.

Jaloliddin Qobiljonov