Эртага, 17 январь куни Япония терма жамоаси Осиё кубоги гуруҳ босқичи 3-туридан ўрин олган баҳсда Ўзбекистонга қарши майдонга тушади. Мазкур ўйин олдидан японияликлар ҳужумчиси Такуми Минамино баҳс ҳақидаги фикрлари билан қизиқдик.

“Аввалги ўйинда кўплаб вазиятларни қўкка совурдим. Аммо бундан ташвишланмайман. Чунки гол урмагунимга қадар дарвоза томон зарба беришдан чарчамайман. Ўтган ўйиндан муҳрланган видеотасмаларга қараганимда, кўпроқ ўнг бурчакка интилганимни кўрдим. Умид қиламанки, Ўзбекистонга қарши ўйинда бундай хатоларга йўл қўймайман. Чет элга 19 ёшимда кетганман. Орадан 4 йил ўтди. Вақт тез ўтяпти, аммо ҳозирги ҳолатимдан мамнун эмасман. Кучли футболчи бўлиш учун янада кўпроқ ўз устимда ишлашим керак”, -дейди Минамино.

Маълумот ўрнида, Минамино Австриянинг “Ред Бул Зальцбург” жамоаси аъзоси ҳисобланади.

Эслатиб ўтамиз, 17 январь куни Осиё Кубоги гуруҳ босқичидан ўрин олган сўнгги тур учрашувини Ўзбекистон миллий терма жамоаси Ал-Айн шаҳридаги "Халифа бин Зайд" стадионида Японияга қарши ўтказади. Мазкур баҳсни БААлик ҳакам Муҳаммад Абдулла Ҳасан Муҳаммад бошқаради.

Таъкидлаб ўтамиз, Минамино Уммон - Япония учрашувида рақибни ушлаб қолгани учун ҳакам томонидан сариқ карточка билан жазоланган эди. Ушбу ҳаракати учун ОФК футболчини 5000 АҚШ доллари миқдорида жаримага тортди.

Жалолиддин Қобилжонов