Professional futbol ligasi klublar oldiga qo‘yayotgan asosiy talablardan biri futbol akademiyalari faoliyatini takomillashtirish, tarbiyalanuvchilarga zarur barcha shart-sharoitlarni yaratib berish sanaladi.
Bu borada mamlakatimizdagi eng oldi akademiyalardan biri sifatida “Nasaf” futbol klubi qoshidagi akademiyasini ko‘rsatish mumkin.
“Metallurg” futbol klubi matbuot xizmatining ma’lum qilishicha, shu kunlarda Bekobod klubi futbol maktabi rahbariyati “Nasaf” futbol akademiyasida tajriba o‘rganish, mahorat saboqlarini olish va Bekobodda amaliyotgan tadbiq etishni maqsad qilib, Qarshi shahrida bo‘lib turishibdi. Safar davomida bekobodlik mutaxassislar “Nasaf” futbol akademiyasida yaratilgan sharoitlarni o‘rganishyapti.
Akademiyada ishni tashkil etish, mashg‘ulotlar jarayoni, ovqatlanish, dam olish sharoitlari, futbolchilarning bo‘sh vaqtlarini qanday o‘tkazishlari yuzasidan “Nasaf” akademiyasi ish tartibini o‘rganishmoqda.
