O‘zbekiston Professional Futbol Ligasi matbuot xizmati 2019 yilgi O‘zbekiston Chempionati va Kubogi bahslari uchun OAV vakillarini akkreditasiyadan o‘tkazish jarayoni boshlanganini ma’lum qiladi.   2019 yilgi Superliga, Pro-Liga va O‘zbekiston Kubogi uchrashuvlarini bevosita stadionning o‘zida yoritishni maqsad qilgan barcha turdagi OAV vakillari o‘z xodimlari ro‘yxati kiritilgan arizani 4 fevral kunidan 17 fevralgacha O‘zPFL elektron pochtasi (info@pfl.uz)ga jo‘natishlari talab etiladi.   Akkreditasiyaga ariza berish namunasi va talablari bilan O‘zPFL rasmiy saytining «Hujjatlar» bo‘limidagi «Akkreditasiyadan o‘tkazish tartibi» faylini ko‘chirib olish orqali tanishish mumkin.   Ma’lumot o‘rnida, 2013 yilda O‘zPFL Matbuot xizmati tomonidan «Akkreditasiyadan o‘tkazish tartibi» ishlab chiqilgan bo‘lib, unda jurnalistlarga akkreditasiya berish jarayonida e’tibor qaratiladigan jihatlar batafsil ko‘rsatib o‘tilgan.   Qayd etish joiz, akkreditasiya sportga ixtisoslashgan internet-nashrlari xodimlariga nashrning O‘zbekiston qonunchiligiga asosan rasman ro‘yxatdan o‘tganligi va kundalik tashrif buyuruvchilari soni 5000dan ortiq bo‘lishiga qarab berilishi ko‘zda tutilgan.    Ta’kidlab o‘tamiz, 2019 yilgi mavsum uchun barcha turdagi akkreditasiya kartalari faqat O‘zPFL matbuot xizmati tomonidan beriladi.