«Manchester Siti» bosh murabbiyi Pep Gvardiola «Everton»ga qarshi bo‘lib o‘tgan o‘yin (2:0) borasida o‘z fikrlari bilan o‘rtoqlashdi.

«Gudison Park», 2:0, natijadan qoniqish hosil qildim. Ikkinchi bo‘limda muammolarga duch keldik, lekin umuman o‘yin yaxshi bo‘ldi. Raqibga darvozamiz tomon birorta aniq zarba berishiga yo‘l qo‘ymadik. Birinchi bo‘lim so‘ngida urgan golimiz bizga yordam berdi.

Biz jahondagi eng kuchli jamoa emasmiz. Shu bois, standartlardan gollarni kutmaymiz. Lekin Mikel Arteta buning ustida ko‘p ishlayapti. O‘yin borasidagi ayrim qarorlarim yaxshiroq bo‘lishi mumkin edi, ammo ularni tahlil qilish — mening ishim.

Gabriel Jezus uncha ko‘p bo‘lmagan vaqtda 9ta gol urdi. Serxio [Aguero] o‘tgan turda 3ta gol urdi. Ixtiyorimizda ikki nafar ajoyib hujumchilar borligi — bu zo‘r. Mana 3 oydan beri haftadan 2tadan o‘yin o‘tkazib kelyapmiz.

«Liverpul»ga nisbatan bitta o‘yin ko‘p o‘tkazganmiz. Albatta, birinchi o‘rinda ekanimiz juda yaxshi, ammo «Liverpul»ni 24 fevral kuni «Old Trafford»da o‘yin kutib turibdi. Mersisaydliklar o‘sha bahsda g‘alaba qozonishsa, biz peshqadamlikni boy beramiz.

Bu haqda ko‘p bosh qotirmayapman. Lekin 4-5 kun oldin biz 7 ochko ortda qolayotgandik. Bu bizga saboq bo‘lishi kerak. Biz hech qachon bo‘shashmasligimiz lozim.

Yakshanba kuni bizni «Chelsi»ga qarshi ajoyib sinov kutib turibdi. Og‘ir o‘yin bo‘ladi. Hozir barcha «non-stop» rejimida», — dedi Gvardiola.