Shu kunlarda Yaponiyaning Gifu shahrida Osiyo xokkey federasiyasining Kongressi bo‘lib o‘tmoqda. Unda O‘zbekiston chim ustida xokkey federasiyasi raisi Bahodir Ahmedovga O‘zbekistonda sportning ushbu turini rivojlantirishga va ommaviyligini oshirishga qo‘shgan hissasi uchun qit’a federasiyasining maxsus mukofoti topshirildi. Shuningdek, u Kongressda ilk bor qit’a federasiyasining ijroiya qo‘mitasi a’zoligiga saylandi.

Bahodir Ahmedov Kongress davomida O‘zbekistonda chim ustida xokkeyni rivojlantirish bo‘yicha bir qator kelishuvlarga erishdi. O‘tgan yilning kuzida federasiya rahbari hamda bosh kotib Hindistonning Dehli shahrida Chim ustida xokkey xalqaro federasiyasining 46-Kongressida ishtirok etib, Osiyo va Jahon federasiyalari mutasaddi rahbarlari bilan uchrashgan va bir qator masalalar yuzasidan muzokaralar olib borgan edi.

Buning natijasida mamlakatimizda chim ustida xokkey uchun mo‘ljallangan, qiymati 400 ming AQSH dollarlik xalqaro talablarga javob beruvchi maxsus maydon qoplamasini qurib berish bo‘yicha kelishuvga erishilgan. Tomonlar kelasi yilda Toshkentda xalqaro musobaqa tashkil qilish, shuningdek, sport inventarlarini yetkazib berish bo‘yicha rasmiy kelishuvga erishdilar.