Niderlandiya qirollik futbol ittifoqi «Ayaks»ga yordam berishga qaror qildi.

Amsterdamliklarning Gollandiya chempionati doirasida «Zvolle»ga qarshi 2 mart kuni bo‘lishi kerak bo‘lgan o‘yini 13 martga ko‘chirildi. Shu tariqa, "Ayaks" "Real"ga 5 mart kuni bo‘ladigan YECHL nimchorak finalning javob bahsi oldidan 3 kun emas, bir hafta dam olish imkoniyatiga ega bo‘ldi.

Ammo bu qaror «Zvolle»ga yoqmadi va jamoa Niderlandiya qirollik futbol ittifoqiga shikoyat bilan murojaat qildi. Biroq ittifoq ularning murojaatiga rad javobini berdi.

«Ayaks» esa «Zvolle» muxlislarining Amsterdamga kelib-ketish xarajatlarini qoplab beradigan bo‘ldi. Shunga qaramay, raqib jamoa muxlislari norozi bo‘lishdi va «De Grafsxap»ga qarshi o‘yinda o‘z noroziliklarini banner orqali izhor qilishdi: «KNVB – mafiya».

Bundan tashqari, «Zvolle» rahbari Adrian Visser o‘z noroziligini ma’lum qildi.

«Bu chempionat ustidan kulish va bunga yo‘l qo‘yib bo‘lmaydi. KNVB musobaqadagi tartibni saqlashi lozim. Endi esa, raqiblardan farqli o‘laroq, biz bir haftada 3ta o‘yin o‘tkazishga majbur bo‘lamiz.

Federasiya bizga murojaat qilib, agar «Ayaks» «Real»ga qarshi o‘yinda ijobiy natija qayd etsa, uchrashuvni ko‘chirishga rozi bo‘lish yoki bo‘lmasligimizni so‘radi. «Ayaks» esa birinchi bahsda yutqazdi. Agar amsterdamliklar ijobiy natijaga erishganida ham biz o‘yinning ko‘chirilishiga rozi bo‘lmasdik. Men buni o‘sha zahoti aytgandim.

Ammo KNVB UYEFA va Amsterdam shahar rahbariyatining ijozati bilan press-reliz e’lon qilishga qaror qildi. Bu kulgili. Biz bunga yo‘l qo‘ya olmaymiz», – dedi Visser.

Gollandiya chempionatining ushbu mavsumida "Ayaks" 53 ochko bilan 2-o‘rinni egallab turibdi. Jamoa peshqadam "PSV"dan 4 ochko ortda qolmoqda. "Zvolle" esa 25 ochko bilan 15-pog‘onani band etib turibdi. Ularni xavfli hududdan atigi 1 ochko ajratib turibdi.