Bu yangilik meni shok holatiga tushirib qo‘ydi. Babayan ismini eshitgan zahotim Janubiy Koreya bilan durangdan so‘ng JCH dan ayrilgan qora ko‘zlarning yig‘lamsirab «Baba, aut», — deya hayqirib turgani ko‘z oldimdan o‘tib ketdi...

O‘sha uchrashuvdan so‘ng sharmandali tarzda matbuot anjumanidan «qochib» ketgan «qahramonimiz» «o‘zbek futbolidan chetlatildi», — degan xabar chiqqach,alamlar biroz yodimizdan ko‘tarilgan edi.

Afsus, u yana yurtimizda ish boshlamoqda. Har bir erkin jurnalistning o‘z pozisiyasi bo‘lishi shart! Shaxsan men ushbu qarorning mohiyatini sira tushuna olmadim. O‘z-o‘zidan savollar paydo bo‘ladi.

E’tibor berib qarasangiz, so‘nggi Osiyo kubogida «Lokomotiv» terma jamoa darajasidagi bir nechta futbolchilarni yetkazib berdi. Bundan tashqari ketma-ket ichki chempionatda g‘olib bo‘ldi. Barchasini to‘g‘ri bajarayotgan klub uchun maslahatchi nima uchun kerak bo‘lib qoldi ekan? «Lokomotiv» klub mutasaddilari Babayanga qo‘yilgan cheklovni qanday aylanib o‘tishdi ekan? Eng so‘nggi savolim: Babayanning vijdoni yurtimiz futboliga qaytishni qanday hazm qildi?..

Savollar ko‘p, ammo javoblar yo‘q. Nahotki, yangilanish va yuksalish yo‘lida turgan futbolimizdagi o‘zgarishlar shunchaki quruq gap bo‘lsa? To‘g‘risi, tushunasiz qaror. Balki, bu yerda biz bilmagan boshqa gaplar bordir.

Bilmadik, ammo O‘FAdan shu kunlarda Samvel Babayanning qanday qilib yurtimizda yana ish boshlagani to‘g‘risida izohni kutib qolamiz. Axir, bu futbol - xalqimizniki! Xalqning unga reaksiyasi qanday ekanligini bilgan holda shunday ish tutishdimi, demak, bunga izoh berishlari shart! Biz sizlarning izohingizni kutyapmiz, qadrli futbolimizning jonkuyar rahbarlari?!

Yahyoxo‘ja Ulug‘xo‘jayev