Бу янгилик мени шок ҳолатига тушириб қўйди. Бабаян исмини эшитган заҳотим Жанубий Корея билан дурангдан сўнг ЖЧ дан айрилган қора кўзларнинг йиғламсираб «Баба, аут», — дея ҳайқириб тургани кўз олдимдан ўтиб кетди...

Ўша учрашувдан сўнг шармандали тарзда матбуот анжуманидан «қочиб» кетган «қаҳрамонимиз» «ўзбек футболидан четлатилди», — деган хабар чиққач,аламлар бироз ёдимиздан кўтарилган эди.

Афсус, у яна юртимизда иш бошламоқда. Ҳар бир эркин журналистнинг ўз позицияси бўлиши шарт! Шахсан мен ушбу қарорнинг моҳиятини сира тушуна олмадим. Ўз-ўзидан саволлар пайдо бўлади.

Эътибор бериб қарасангиз, сўнгги Осиё кубогида «Локомотив» терма жамоа даражасидаги бир нечта футболчиларни етказиб берди. Бундан ташқари кетма-кет ички чемпионатда ғолиб бўлди. Барчасини тўғри бажараётган клуб учун маслаҳатчи нима учун керак бўлиб қолди экан? «Локомотив» клуб мутасаддилари Бабаянга қўйилган чекловни қандай айланиб ўтишди экан? Энг сўнгги саволим: Бабаяннинг виждони юртимиз футболига қайтишни қандай ҳазм қилди?..

Саволлар кўп, аммо жавоблар йўқ. Наҳотки, янгиланиш ва юксалиш йўлида турган футболимиздаги ўзгаришлар шунчаки қуруқ гап бўлса? Тўғриси, тушунасиз қарор. Балки, бу ерда биз билмаган бошқа гаплар бордир.

Билмадик, аммо ЎФАдан шу кунларда Самвел Бабаяннинг қандай қилиб юртимизда яна иш бошлагани тўғрисида изоҳни кутиб қоламиз. Ахир, бу футбол - халқимизники! Халқнинг унга реакцияси қандай эканлигини билган ҳолда шундай иш тутишдими, демак, бунга изоҳ беришлари шарт! Биз сизларнинг изоҳингизни кутяпмиз, қадрли футболимизнинг жонкуяр раҳбарлари?!

Яҳёхўжа Улуғхўжаев