Avval xabar berib o‘tganimizdek, "Uzbek Tigers" jamoasi Butunjahon boks seriyasi (WSB)ning to‘qqizinchi mavsumida ham qatnashadi.

Bugun bokschilarimizning mazkur turnirdagi ishtiroki yuzasidan AIBA vakili Karim Buzidi bilan uchrashuv bo‘lib o‘tdi. Unda Milliy olimpiya qo‘mitasi Bosh kotibi Jasur Matchanov musobaqaning yangi mavsumidagi tizim, tashkiliy masalalar yuzasidan janob Karim Buzidi bilan fikr almashdi.

O‘z navbatida AIBAdan tashrif buyurgan mas’ul yangi tizim haqida gapirib berdi. Unga ko‘ra, WSBning ushbu mavsumi 8 ta vazn toifasida tashkil etiladi. Har bir vaznda ikki nafar bokschi Olimpiya o‘yinlari lisenziyasiga ega bo‘ladi.

Shuningdek, u suhbat davomida yurtimiz bokschilarining imkoniyatlari katta ekanligi, o‘zbek boksi maktabi haqidagi iliq fikrlarini bildirib o‘tdi. O‘zbekiston haqiqiy boks mamlakati ekanligini aytib, bu mamlakatimizda WSBning O‘zbekiston bosqichini tashkil etish imkoniyatini yaratib berishi haqida gapirdi. Ayni paytda bunday musobaqa Kuba va Venesuelada tashkil qilinadi. Tomonlar uchrashuv chog‘ida ushbu musobaqaning O‘zbekiston bosqichini ham tashkil etish yuzasidan o‘z fikr-mulohazalarini bildirib o‘tdilar.