Hozirga kelib bir qator futbolchilar shartnoma shartlarini bajarmagan klublar bilan ziddiyatga borishi holatlari uchramoqda.
Futbolchilarning o‘z pullarini ola olmayotgani va shartnoma shartlarini bajarmayotgan klublar bunga befarq qarayotgani ham haqiqat.
Professional Futbol Ligasi hozirga kelib, futbolchilar va klublar o‘rtasida bunday nizoli va ziddiyatli vaziyatlar uchramasligi uchun bir qator ishlarni amalga oshirmoqda. Jumladan, klublar shartnoma shartlarini bajarmay, futbolchilar oldidagi qarzni uzmay, yangi mavsumga futbolchilarni zayavkadan o‘tkaza olmaydi. Shuningdek, bunday holat yana qaytarilmasligi uchun klublarga yangi, barcha bandlar ko‘rsatilishi shart bo‘lgan shartnoma taqdim etildi. Bunga ko‘ra, endilikda futbolchilar bilan shartnomada barchasi ko‘rsatiladi, mukofot pullari va maoshlar summasi, ularning muddatlari ko‘rsatiladi.
Hozirga kelib, Professional Futbol Ligasi shartnoma shartlarini bajarmayotgan klublar bilan futbolchilar o‘rtasidagi nizolarni hal qilishga harakat qilmoqda. Jumladan, “Buxoro” futbol klubida faoliyat ko‘rsatgan futbolchilar shartnoma shartlarini bajarmagan klub yuzasidan PFLga vaziyatni ijobiy hal qilish uchun murojaat qilishgan.
Futbolchilarning maqomi va klubdan klubga o‘tishi bo‘yicha Qo‘mita ushbu murojaatni ko‘rib chiqib, klubning futbolchilar oldidagi qarzdorligi masalasida qaror qabul qildi. Unga ko‘ra, shartnoma shartlarini muddatida bajarmagan klub qattiq ogohlantirildi va qarzlar to‘liq undirib berildi. Klub safida o‘ynagan 8 nafar futbolchi bugunga kunga kelib barcha pullarini olishdi. Jumladan, Shahboz Erkinov klub qarzdorlikni bartaraf etganini va maoshlarini olganini ta’kidladi.
“Klub oldingi mavsum uchun maoshlarimni berdi. Bungacha ancha vaqt klub mendan va boshqa futbolchilar oldidagi qarzdorlikni bartaraf qilmay, maoshlarni va mukofot pullarini bermay kelayotgandi. Yakunda shikoyat qilishga majbur bo‘ldik”, - deydi Erkinov.
“PFL ushbu shikoyatni ko‘rib chiqdi va yakunda qarzlar bartaraf etildi. Buning uchun albatta, Professional Futbol Ligasiga raxmat aytaman. Ular o‘z vaqtida murojaatimizni ko‘rib chiqishdi va qarzlar yakunda “Buxoro”dan olib berildi. Hozirda, PFLda ancha islohotlar qilindi, bundan biz futbolchilar ham, klublar ham, muxlislar ham yutadi. Bunday shikoyatlar va arizalar kelgusida qaytarilishi futbolimiz imiji uchun salbiy holat.SHuning uchun ham PFL bu borada klublar rahbarlari va futbolchilar bilan suhbatlashayapti. Kelgusida bunday nizolar kelib chiqmasligi muhim”, - deydi futbolchi.
