O‘zbekiston futbol assosiasiyasida mamlakatimizda faoliyat yuritayotgan futbol sharhlovchilari uchun maxsus seminar tashkil etildi. Seminarni O‘FA Hakamlar va nazoratchilar departamenti boshlig‘i Ma’mur Saidqosimov, departament yetakchi mutaxassisi Vladislav Seytlin, taniqli hakamlar, FIFA referilari Ravshan Ermatov va Valentin Kovalenkolar olib borishdi.
Seminar davomida futbol sharhlovchilari uchun futbol qoidalariga kiritilgan yangi o‘zgarishlar haqida ma’lumot berildi. Shuningdek, hakamlarning turli bahsli vaziyatlarda qarorlar qabul qilishda nimalarga asoslanib harakat qilishlari tushuntirib o‘tildi. Yig‘ilganlarga videomateriallar namoyish qilinib, amaliy misollar bilan maydonda ro‘y beradigan holatlar tahlil qilindi.
Seminar davomida sharhlovchilar mutaxassislarga o‘zlarini qiziqtirgan savollar bilan murojaat qilib, tegishli javoblar olishdi.