Mamlakat milliy chempionati bahslariga tayyorgarlik ko‘rayotgan Bekobodning “Metallurg-vumen” jamoasi qizlari o‘quv-mashg‘ulot yig‘inini davom ettirmoqda.
O‘tgan mavsumda uchinchi o‘rinni egallab, bronza medaliga sazovor bo‘lgan Avaz Maxsumov shogirdlari jismoniy tayyorgarlik mashqlari barobarida nazorat uchrashuvlariga ham e’tibor qaratmoqda.
Bugun poytaxtimizning Chilonzor tumanida joylashgan “Paxtakor” futbol akademiyasiga qarashli sun’iy qoplamali maydonda bekobodlik qizlar AGMK-vumen jamoasiga qarshi o‘yin o‘tkazishdi.
Qiziqarli va murosasiz kurashlar ostida o‘tgan o‘yinda “Metallurg-vumen” qizlari har tomonlama ustunlik qilishdi. Uchrashuvdagi dastlabki hujumniyoq bekobodliklar golga aylantirishdi. Elvina Ablyakimova dugonalari boshlab bergan hujumni gol bilan yakunladi.
Oradan yigirma daqiqacha vaqt o‘tib Shoira Qulto‘rayeva farqni oshirishga erishdi. Ikkinchi bo‘limda ham yana bir marta muvaffaqiyatga erishgan Shoira dublini rasmiylashtirish barobarida “Metallurg-vumen”ning yirik g‘alabasini ta’minladi.
Shu o‘rinda qayd etish lozim, “Metallurg-vumen”ning bir qator o‘yinchilari ayni paytda O‘zbekiston terma jamoalari yig‘inida ishtirok etishmoqda.
