Мамлакат миллий чемпионати баҳсларига тайёргарлик кўраётган Бекободнинг “Металлург-вумен” жамоаси қизлари ўқув-машғулот йиғинини давом эттирмоқда.
Ўтган мавсумда учинчи ўринни эгаллаб, бронза медалига сазовор бўлган Аваз Махсумов шогирдлари жисмоний тайёргарлик машқлари баробарида назорат учрашувларига ҳам эътибор қаратмоқда.
Бугун пойтахтимизнинг Чилонзор туманида жойлашган “Пахтакор” футбол академиясига қарашли сунъий қопламали майдонда бекободлик қизлар АГМК-вумен жамоасига қарши ўйин ўтказишди.
Қизиқарли ва муросасиз курашлар остида ўтган ўйинда “Металлург-вумен” қизлари ҳар томонлама устунлик қилишди. Учрашувдаги дастлабки ҳужумниёқ бекободликлар голга айлантиришди. Элвина Аблякимова дугоналари бошлаб берган ҳужумни гол билан якунлади.
Орадан йигирма дақиқача вақт ўтиб Шоира Қултўраева фарқни оширишга эришди. Иккинчи бўлимда ҳам яна бир марта муваффақиятга эришган Шоира дублини расмийлаштириш баробарида “Металлург-вумен”нинг йирик ғалабасини таъминлади.
Шу ўринда қайд этиш лозим, “Металлург-вумен”нинг бир қатор ўйинчилари айни пайтда Ўзбекистон терма жамоалари йиғинида иштирок этишмоқда.
