Yangi mavsumda o‘z oldiga jiddiy maqsadlar qo‘ygan Namanganning “Navbahor” klubi tayyorgarlikning so‘nggi bosqichini Toshkentda olib bormoqda.
“Lochinlar”ning poytaxtimizdagi navbatdagi mashg‘ulotlari o‘z yakuniga yetgach, biz “Navbahor” bosh murabbiyi Andrey Kanchelskisdan intervyu oldik.
- Andrey Antanasovich, yangi mavsum boshlanishiga ham sanoqli kunlar qoldi. Aytingchi, Superliganing bo‘lajak mavsumiga tayyorgarlik qanday o‘tdi, undan qoniqish hosil qildingizmi?
- Yangi mavsumga tayyorgarlikni Namangan, Qrim va Turkiyada olib bordik. Mana endi so‘nggi o‘quv-mashg‘ulot yig‘inini Toshkentda olib boryapmiz. Umuman olganda, tayyorgarlikdan qoniqish hosil qildim, ammo jamoamiz o‘z uy uchrashuvlarini o‘tkazadigan maydonning tayyor emasligi biroz ko‘ngilni xijil qiladi.
Mayli, Xudo xohlasa, maydon sifati ancha yaxshilanadi va futbolchilar ham sifatli maydonda yayrab to‘p surishadi hamda muxlislarimizga o‘z g‘alabalari bilan quvonch ulashishadi, degan niyatdamiz.
- Jamoa tarkibini o‘zingiz xohlagandek, shakllantira oldingizmi?
- Menimcha, hech qaysi murabbiy o‘z qo‘l ostidagi tarkibdan qoniqish hosil qilmasa kerak. Lekin jamoamiz safiga tajribali, shuningdek, kelajagi porloq va mahoratli, bundan tashqari, jamoa uchun jon kuydiradigan futbolchilarni jalb eta oldik. Mazkur shogirdlarim bilan yangi mavsumda oldimizga qo‘yilgan maqsadni amalga oshiramiz, degan umiddaman.
- O‘tgan yilgi mavsumda Superliga uchrashuvlari 12ta klub ishtirokida “oltin ochkolar” tizimida o‘tkazilgandi, bu yil esa jamoalar soni 14 taga yetkazilib, o‘yinlar 2 davrali tizim asosida o‘tkaziladigan bo‘ldi. Bunga qanday munosabat bildirasiz?
- Shotlandiyada 12ta jamoa ishtirok etadi va ushbu mamlakat chempionati 4 davrali tizim asosida o‘tkaziladi. Ko‘plab davlatlarda esa chempionat bahslari 2 davrali tizim asosiga qurilgan. O‘zbekistonda ham shu tizimga qaytilgani ijobiy holat bo‘ldi.
- Yangi mavsumda “Navbahor”ning oldiga qanday vazifa qo‘yilgan?
- O‘tgan yili klubimiz bronza medali sohibiga aylandi. Yangi mavsumda esa marrani yanada balandroq olib, undan-da yuqoriroq o‘rinlar uchun kurash olib borish niyatidamiz. Buni amalga oshirish uchun qo‘ldan kelganicha harakat qilamiz.
