Bugun Namanganning “Navbahor” U-21 yoshlar jamoasi Andijon viloyatida 24 fevraldan start olgan “Hokim kubogi - 2019” musobaqasining final bahsida qatnashdi.
Hal qiluvchi o‘yinda Rahim G‘ofurov shogirdlariga Andijonning “Rash-Milk” jamoasi raqib bo‘ldi. Uchrashuv keskin kurashlarga boy va shiddatli tarzda kechdi. Unda “Rash-Milk” jamoasi 1:0 hisobida g‘alaba qozondi.
Ta’kidlash joizki, andijonliklar yagona to‘pni bahsning 83-daqiqasida penaltidan kiritishdi. Mazkur o‘yinda yoshlar jamoamiz ustozi Rahim G‘ofurov maydonga quyidagi futbolchilarni tushirdi: Mirjalol Mamatxanov, Rahim Sharipov, Sodiq Ortiqov, Mirjalol Abdumutalov, Ayubxon Jo‘rayev, Qodir Ikromov, Sherzod G‘ulomjonov, Komil Tojiddinov, Shukurullo Xoldoraliyev, Shohruhmirzo Ahmadaliyev, Sherzod Hamidov.
Zaxiradan maydonga tushganlar: Ulug‘bek Egamberdiyev, Mahmud Najmiddinov, Abdurasul Qayumboyev, Husayn Ergashboyev, Boburshoh Sobirov, Ismoil Abduraimov, Asad Lutfullayev.
Uchrashuv yakunlanganidan so‘ng, har ikki jamoa vakillarini taqdirlash marosimi o‘tkazildi. Unda Andijon va Namangan viloyatlari futbol assosiasiyasi vakillari, jumladan, Namangan viloyat futbol assosiasiyasi 1-vise-prezidenti Bahrom Xolmirzayev ishtirok etib, turnir g‘olibi – “Rash-Milk” jamoasiga Andijon viloyat hokimi kubogi, musobaqa finalchisi - “Navbahor” U-21 yoshlar jamoasiga maxsus faxriy yorliq hamda har ikki jamoa futbolchilariga qimmatbaho sovg‘alar topshirishdi.
Yoshlar jamoamiz vakillaridan Sodiq Ortiqov – turnirning eng yaxshi himoyachisi, Komil Tojiddinov esa eng yaxshi yarim himoyachisi deb topilishdi va musobaqa tashkilotchilari tomonidan maxsus sovg‘alar bilan taqdirlanishdi.
