Бугун Наманганнинг “Навбаҳор” U-21 ёшлар жамоаси Андижон вилоятида 24 февралдан старт олган “Ҳоким кубоги - 2019” мусобақасининг финал баҳсида қатнашди.

Ҳал қилувчи ўйинда Раҳим Ғофуров шогирдларига Андижоннинг “Раш-Милк” жамоаси рақиб бўлди. Учрашув кескин курашларга бой ва шиддатли тарзда кечди. Унда “Раш-Милк” жамоаси 1:0 ҳисобида ғалаба қозонди.

Таъкидлаш жоизки, андижонликлар ягона тўпни баҳснинг 83-дақиқасида пенальтидан киритишди. Мазкур ўйинда ёшлар жамоамиз устози Раҳим Ғофуров майдонга қуйидаги футболчиларни туширди: Миржалол Маматханов, Раҳим Шарипов, Содиқ Ортиқов, Миржалол Абдумуталов, Аюбхон  Жўраев, Қодир Икромов, Шерзод  Ғуломжонов, Комил Тожиддинов, Шукурулло Холдоралиев, Шоҳруҳмирзо Аҳмадалиев, Шерзод Ҳамидов. 

Захирадан майдонга тушганлар: Улуғбек Эгамбердиев, Маҳмуд Нажмиддинов, Абдурасул Қаюмбоев, Ҳусайн Эргашбоев, Бобуршоҳ Собиров, Исмоил Абдураимов, Асад Лутфуллаев.

Учрашув якунланганидан сўнг, ҳар икки жамоа вакилларини тақдирлаш маросими ўтказилди. Унда Андижон ва Наманган вилоятлари футбол ассоциацияси вакиллари, жумладан, Наманган вилоят футбол ассоциацияси 1-вице-президенти Баҳром Холмирзаев иштирок этиб, турнир ғолиби – “Раш-Милк” жамоасига Андижон вилоят ҳокими кубоги,  мусобақа финалчиси  - “Навбаҳор”  U-21 ёшлар жамоасига махсус фахрий ёрлиқ ҳамда ҳар икки жамоа футболчиларига қимматбаҳо совғалар топширишди.

Ёшлар жамоамиз вакилларидан Содиқ Ортиқов – турнирнинг энг яхши ҳимоячиси, Комил Тожиддинов эса энг яхши ярим ҳимоячиси деб топилишди ва мусобақа ташкилотчилари томонидан махсус совғалар билан тақдирланишди.