Bugun Qatar futbol assosiasiyasi prezidenti Xamid bin Xalifa bin Ahmad Al-Tani poytaxtimizga tashrif buyurdi. Faxriy mehmonni Islom Karimov nomidagi Toshkent xalqaro aeroportida MOQ prezidenti, O‘zbekiston futbol assosiasiyasining birinchi vise-prezidenti Umid Ahmadjonov kutib oldi.

Martabali mehmonni qarshi olar ekan Umid Ahmadjonov Qatar futbol assosiasiyasi prezidentini mamlakat terma jamoasining Osiyo Kubogidagi muvaffaqiyati bilan samimiy muborakbod etdi.

Qatar futboli so‘nggi yillarda jadallik bilan rivojlanib bormoqda. Buni terma jamoa joriy yilgi Osiyo Kubogida g‘alaba qozongani, 2022 yilgi jahon chempionatiga mezbonlik qilishidan bilib olish qiyin emas.

Ma’lumki, O‘zbekiston va Qatar futbol assosiasiyalari o‘rtasida o‘zaro hamkorlik borasida memorandum imzolangan. Ushbu tashrif davomida ikki terma jamoaning asosiy va turli yosh toifalari o‘rtasida o‘rtoqlik uchrashuvlari, hakamlar va murabbiylar uchun turli seminarlar tashkil qilish borasida kelishuvlar amalga oshishi kutilmoqda.

Har ikki assosiasiya rahbarlari ertaga MOFA (Markaziy Osiyo futbol assosiasiyasi) ning navbatdagi kongressida ishtirok etish uchun Qirg‘iziston poytaxti Bishkek shahriga jo‘nab ketishadi.