Joriy yilning 22-23 mart kunlari Moskva shahrida o‘tkazilayotgan sambo bo‘yicha Jahon kubogida O‘zbekiston milliy terma jamoasi ham ishtirok etayotgani haqida xabar bergan edik.

Musobaqaning birinchi kunida ayollar o‘rtasida 52 kg, 60 kg, 68 kg, 80 kg, erkaklar o‘rtasida 57 kg, 68 kg, 82 kg, 100 kg va jangovar sambo bo‘yicha 57 kg, 68 kg, 82 kg, 100 kg vazn toifasidagi sportchilar tatamiga chiqishdi.

2018 yilda Osiyo chempioni bo‘lgan sportchimiz Sirojiddin Anorqulov (-57 kg, jangovar sambo) barcha raqiblarini mag‘lubiyatga uchratib, oltin medalni qo‘lga kirilgan bo‘lsa, ushbu yo‘nalish bo‘yicha bahslarda ishtirok etgan yana bir sportchimiz, Osiyo chempioni va 2018 yilda Ashxobodda o‘tkazilgan yopiq inshootlardagi Osiyo o‘yinlari g‘olibi Zafar Allabergenov (-68 kg) ham barcha raqiblari ustidan zafar quchdi. Ayniqsa finalda rossiyalik Nikita Podkovalnikovga qarshi kechgan jang qizg‘in bahslarga boy bo‘lib, yakunda vakilimiz oltin medalga sazovor bo‘ldi.

Jangovar sambo bo‘yicha yana bir vakilimiz 2018 yilgi jahon chempionatining bronza medali sovrindori Bekzod Nurmatovga (-82 kg) finalda biroz omad yetishmadi. U rossiyalik Aslanbek Kadzayevga imkoniyatni boy berdi va musobaqaning kumush medaliga ega chiqdi.

Shuningdek, Ulug‘bek Rahmonov (-82 kg), Zuhraxon Ma’murjonova (-52 kg) hamda Timur Xudoyqulov (-68 kg) o‘z vaznlarida shohsupaning uchinchi pog‘onasiga ko‘tarilishdi.

Shunday qilib, sambochilarimiz jahon kubogining birinchi kunida 2 ta oltin, 1 ta kumush, 3 ta bronza jami 6 ta medalni qo‘lga kiritishdi. 23 mart kuni musobaqaning ikkinchi kunida ayollar o‘rtasida 48 kg, 56 kg, 64 kg, 72 kg, +80 kg, erkaklar o‘rtasida 52 kg, 62 kg, 74 kg, 90 kg, +100 kg va jangovar sambo bo‘yicha 52 kg, 62 kg, 74 kg, 90 kg, +100 kg vazndagi sportchilar bahsga kirishadi.