Yer yuzida ayollar futboli tobora ommalashmoqda, unga qiziqish darajasi oshmoqda. Oldinroq «Atletik» (Bilbao) ayollar jamoasining muxlis to‘plash bobida rekord o‘rnatgani haqida yozgandik.
Oradan hech qancha o‘tmay, «Atletiko» (Madrid) o‘z adashi rekordini yangiladi. 60 739 muxlis - FIFA kunlari boshlanishidan oldin «Atletiko» va «Barselona» ayollar jamoalari o‘rtasidagi o‘yinni shuncha tomoshabin bevosita stadionda kuzatdi. Bu klublar miqyosidagi ayollar futboli uchun nafaqat Ispaniya, balki jahon rekordidir. Darvoqe, yanvar oyida «San-Mames» stadionida qayd etilgan avvalgi eng yuqori ko‘rsatkichda ham «Atletiko» hissa qo‘shgandi. Ya’ni 48 121 muxlis guvohligida Ispaniya kubogi doirasida kechgan o‘sha uchrashuvda ayol «matraschilar» «Atletik» mehmoni bo‘lishgandi.
«Atletiko» ayollar jamoasi raqibalarini odatda mashg‘ulotlar bazasidagi maydonda qabul qiladi. Biroq jamoa rahbariyati «Barselona»ga qarshi o‘yinga qiziqish kattaligini inobatga olib, manzilni o‘zgartirdi. Ya’ni Ispaniya ayollar chempionatining markaziy uchrashuvi «Vanda Metropolitano» stadioniga ko‘chirildi. Zero, ayni payt har ikki jamoa chempionlik uchun kurashmoqda. Natijaga kelsak, stadionda yuzaga kelgan chinakam «anshlag» madridlik ayollarga naf keltirmadi - ular turnir jadvalidagi peshqadamlik mavqeini mustahkamlash uddasidan chiqishmadi. Boshqacha aytganda, «Barsa» ayollari Madriddan 2:0 hisobi bilan qaytishdi. Endilikda ikki jamoani atigi 3 ochko ajratib turibdi.
Avvaliga o‘yin uchun cheklangan miqdorda chipta tayyorlangan edi - 50 ming dona. Talab kattaligi oydinlashganidan keyingina zudlik bilan yana qo‘shimcha 10 mingta chipta sotuvga chiqarildi. Umuman, «Vanda Metropolitano»dagi uchrashuvga maxsus tayyorlangan chiptalar o‘yinga 5 kun qolgan vaqtdayoq to‘liq sotildi. Aytgancha, ularning bahosi baland emasdi - barcha tribunalar uchun atigi 5 yevro. Qolaversa, «Atletiko» klubi a’zolariga chipta bepul taqdim etildi.
Ayollar futboliga muxlislar tashrifi bo‘yicha mutlaq rekord 1999 yili terma jamoalar o‘yinida o‘rnatilgan. O‘shanda AQSH va Xitoy termalari o‘rtasidagi jahon chempionati final bahsi 90 185 muxlis to‘plagandi.
Aytgancha...
Nike kompaniyasi ayollar terma jamoalari uchun alohida futkolka tayyorladi. Ular erkak futbolchilar formasiga o‘xshamaydi: juda chiroyli, bejirim va texnologik...