Yaxshi bilasiz, O‘zbekiston boks federasiyasi yurtimizda sportning ushbu turini yanada ommalashtirish yo‘lida kerakli keng ko‘lamli ishlarni amalga oshirmoqda.
Yosh avlodni boksga qiziqtirishda sport yulduzlari bilan uchrashuvlar, ommaviy tadbirlarning ahamiyati katta. Bugun Respublikamiz bo‘ylab, boks bo‘yicha katta FLASHMOB (Ochiq mashg‘ulotlar festivali) bo‘lib o‘tdi. Tadbirning Toshkent shahridagi qismi "EcoPark"da tashkil etildi. Soat 12:00da boshlangan tadbirda O‘zbekiston boks federasiyasi mutasaddilari, o‘zbek boksi yulduzlari, yosh bokschilar, estrada yulduzlari, ommaviy axborot vositalari xodimlari va muxlislar ishtirok etishdi.
Tadbir davomida so‘zga chiqqan O‘zbekiston boks federasiyasi raisining birinchi o‘rinbosari Saken Polatov yosh avlodni sportga qiziqtirishda bunday tadbirlarning ahamiyati katta ekanligini, ana shunday qiziqish ortidan bo‘lajak Osiyo, jahon va Olimpiya o‘yinlari chempionlari yetishib chiqishini ta’kidlab o‘tdi. Shuningdek, mamlakatimiz rahbari Shavkat Miromonovich Mirziyoyev va hukumatning sportga, hususan boksga ko‘rsatayotgan e’tibori samarasi o‘laroq, o‘zbekistonlik bokschilar ham xalqaro arenalarda munosib yutuqlarni qo‘lga kiritayotgani ham S.Polatov tomonidan aytib o‘tildi.
Bundan tashqari, tadbirda qatnashgan Rufat Risqiyev, Muhammadqodir Abdullayev, Shahobiddin Zoirov va xorijiy boks yulduzlari o‘zlarining eng samimiy tilaklarini bildirib o‘tishdi.
Shundan so‘ng, tadbirning asosiy qismi - Ochiq mashg‘ulotlar festivali boshlandi. Uni Olimpiya o‘yinlari va jahon chempionati sovrindori Rustam Saidov olib bordi.
O‘zbek estradasi yulduzlari Jahongir Poziljonov, Shahzoda, Nilufar Usmonova, Jasur Umirov kabi xonandalarning chiqishi ushbu boks bayramiga yanada ko‘tarinki kayfiyat bag‘ishladi.
Tadbir davomida yosh sportchilar boksimiz yulduzlari bilan birga suratga tushib, ulardan dastxat olish imkoniyatiga ham ega bo‘lishdi.
O‘zbekiston boks federasiyasi matbuot xizmati
