Yerevanning «Ararat» klubida to‘p surayotgan janubiy afrikalik legioner Mpumelelo Dadiboy Zvane kutilmagan bayonot bilan chiqdi. Zvanening aytishicha, jamoa bosh murabbiyi Abraam Xashmanyan uni sababsiz kaltaklagan.
«2 mart kuni «Ararat» yutqazdi. Men o‘sha kuni maydonga tushmadim. Lekin uchrashuv yakunlangach, u (Abraam Xashmanyan) oldimga kelib, «tirjayma» dedida, shapaloq tushirdi. Buni jamoadoshlarimdan biri ko‘rib turgandi. Afsuski, o‘shanda meni jamoadan haydab yuborishlaridan qo‘rqib, hech kimga voqea haqida og‘iz ochmadim. 25 mart kuni esa o‘rtoqlik o‘yini o‘tkazdik va murabbiy meni chap qanot himoyasiga joylashtirib, 10 daqiqa o‘ynash imkonini berdi. Uchrashuv yakunlangach, Xashmanyan xonamga kelib, chaqirdi. Chiqsam, «ahmoq, foydasiz, qora tanli» deb haqoratladi va yana bir marta shapaloq tushirdi. Ayni paytda bo‘ynim, chap ko‘zim va jag‘im atrofida og‘riq sezyapman. Men har ikki voqea haqida mamlakat futbol federasiyasiga arz qildim. Agar bundan naf chiqmassa, FIFAga murojaat qilaman», — dedi Zvane Armfootball.com sayti muxbiriga.
