Ереваннинг «Арарат» клубида тўп сураётган жанубий африкалик легионер Мпумелело Дадибой Зване кутилмаган баёнот билан чиқди. Званенинг айтишича, жамоа бош мураббийи Абраам Хашманян уни сабабсиз калтаклаган.

«2 март куни «Арарат» ютқазди. Мен ўша куни майдонга тушмадим. Лекин учрашув якунлангач, у (Абраам Хашманян) олдимга келиб, «тиржайма» дедида, шапалоқ туширди. Буни жамоадошларимдан бири кўриб турганди. Афсуски, ўшанда мени жамоадан ҳайдаб юборишларидан қўрқиб, ҳеч кимга воқеа ҳақида оғиз очмадим. 25 март куни эса ўртоқлик ўйини ўтказдик ва мураббий мени чап қанот ҳимоясига жойлаштириб, 10 дақиқа ўйнаш имконини берди. Учрашув якунлангач, Хашманян хонамга келиб, чақирди. Чиқсам, «аҳмоқ, фойдасиз, қора танли» деб ҳақоратлади ва яна бир марта шапалоқ туширди. Айни пайтда бўйним, чап кўзим ва жағим атрофида оғриқ сезяпман. Мен ҳар икки воқеа ҳақида мамлакат футбол федерациясига арз қилдим. Агар бундан наф чиқмасса, ФИФАга мурожаат қиламан», — деди Зване Armfootball.com сайти мухбирига.