“Navbahor” himoyachisi Mirzohid G‘ofurov “Bunyodkor”ga qarshi o‘yin oldidan fikrlarini bildirib o‘tdi.
“Bunyodkor” bilan bo‘ladigan bahsga puxta tayyorgarlik ko‘ryapmiz, mashg‘ulotlarda astoydil qatnashyapmiz.
Oldingi turlardagi “Qo‘qon - 1912” va “Lokomotiv” klublariga qarshi kechgan uchrashuvlarda yuzaga kelgan vaziyatlardan samarali tarzda foydalana olmaganligimiz, shuningdek, omadimiz kelmaganligi bois, durang hamda mag‘lubiyatni qayd etishga majbur bo‘ldik.
“Qaldirg‘ochlar”ga qarshi kechadigan bahsda faqat g‘alaba qozonish ishtiyoqida maydonga tushamiz. Endi hech qanday bahonaga o‘rin yo‘q. “Bunyodkor”ni mag‘lubiyatga uchratishimiz shart. Xudo xohlasa, 6 aprel kuni muxlislarimizga joriy mavsumdagi ilk yutuqni tortiq etamiz, degan umiddaman.
Faqat o‘sha kuni jamoamizni har doimgidek ajoyib tarzda qo‘llab-quvvatlab tursanglar bo‘ldi, aziz muxlislar”, - deydi Mirzohid G‘ofurov.
