Havaskor boks bo‘yicha O‘zbekiston terma jamoasi a’zosi, 64 kg. vazn toifasida Ozarboyjondagi "Buyuk Ipak yo‘li" xalqaro turnirida ishtirok etgan Aliyor Noraliyev janglarning birida jarohat olib, hushini yo‘qotgani va tez tibbiy yordam xodimlari yordamida shifoxonaga olib ketgani haqida xabar bergandik. Musobaqa yakunlangach, O‘zbekistonga qaytgan bokschining o‘zi bilan mazkur voqea yuzasidan intervyu oldik.

"Ozarboyjonlik bokschiga qarshi birinchi jangimning birinchi raundidayoq raqib bilan boshimiz qattiq to‘qnashib ketdi. O‘sha vaqtda qisqa tanaffusdan so‘ng o‘zimga kelib, jangni davom ettirdim. Raqib ustidan g‘alaba qozonib, allaqachon keyingi jangga o‘zimni tayyorlayotgandim. Kiyimlarimni almashtirib zalga qaytganimda o‘zimni biroz yomonroq his qildim va tashqariga chiqishga qaror qildim. Ammo tashqarida ham biroz o‘zimni yomon his qila boshladim. Ko‘zim oldi qorong‘ilashib keta boshladi. Yiqilishimni his qilib shifokorlar yoniga qarab yura boshladim. Lekin ulgurmadim… Qolganini eslolmayman.

Ko‘zimni ochsam, Bokudagi shifoxonaning reanimasiya bo‘limida yotibman. Nima bo‘lganini avvaliga tushunmadim. Keyin so‘rasam, hushimni yo‘qotganim, tilim orqaga ketib qolganini aytishdi. U yerda ham shifokorlar tekshirishdi. MRT qilishdi. Ilgari ham kichik jarohatlar olganim bu safargi jiddiy jarohatga ta’sir qilganini aytishdi.

Toshkentga kelib oldik. Endi reja bo‘yicha bu yerda ham MRT qiladigan bo‘ldik. Rentgen ham qildirib keyin shifokorlar bilan maslahatlashib, yana ishlashda davom etamiz, hozircha esa taxminan ikki oy davomida boks bilan shug‘ullanmasligim kerakligini aytishdi”, — deya gapirib o‘tdi Noraliyev GoSport muxbiri bilan telefon orqali suhbatda.