Xabaringiz bor, kecha boks bo‘yicha terma jamoamiz a’zolari Bokudagi "Buyuk ipak yo‘li" turnirida ishtirok etib, yurtimizga qaytib kelishdi.
O‘zbekiston boks federasiyasi matbuot xizmati bokschimiz Hasanboy Do‘smatov bilan suhbatda ushbu turnirdagi taassurotlar va Osiyo chempionatiga tayyorgarlik jarayoni bilan qiziqdi.
"Ushbu musobaqa Osiyo chempionati oldidan tayyorgarlik vazifasini bajardi. Chunki, musobaqaga oz vaqt qoldi va ikkita jangdan so‘ng ishtirokimni tugatishim kerak edi. Bokudagi turnir davomida rossiyalik va qozog‘istonlik raqiblarimni mag‘lubiyatga uchratdim. Ikkinchi jangimda qoshimdan jarohat oldim. O‘sha payt hakamlar jangni to‘xtatishdi. Ochkolar hisobida oldinda borayotganim sabab bahsda men g‘alaba qozondim. Osiyo chempionati boshlangunga qadar hali vaqt bor. O‘ylaymanki, jarohatim ungacha tuzaladi.
Ozarbayjondagi musobaqa Tailanddagi Osiyo chempionatiga tayyorgarlikning bir qismi edi. Endi qit’a birinchiligiga tayyorgarlikning so‘nggi bosqichini Angrendagi "Yangiobod" o‘quv bazasida olib boramiz. Nasib qilsa, keyin Osiyo chempionatiga jo‘nab ketamiz", - dedi Hasanboy Do‘smatov.
