Xabaringiz bor, O‘zbekiston Professional futbol ligasi 2018 yilgi mavsumning har oyidan keyin to‘rt yo‘nalish bo‘yicha eng yaxshilarni aniqlab keldi: eng yaxshi murabbiy, eng yaxshi futbolchi, eng yaxshi darvozabon va eng chiroyli gol. Tashkil etilgan so‘rovnoma yakunlariga ko‘ra eng ko‘p ovoz to‘play olgan nomzodlar tashkilotning eng yaxshilar uchun atalgan statuetkalarini qabul qilib olishdi.

2019 yilgi mavsumda ham mazkur an’anani davom ettiramiz. Eng yaxshilarni aniqlash shartlari o‘zgarmaydi. Superliganing 14 klubi bosh murabbiylari hamda sardorlari ko‘rsatilgan nomzodlarni uchtalikka joylashtirib chiqadi.

Dastlabki o‘rinda ko‘rsatilgan nomzod 3, mos ravishda keyingi ikki o‘rindagilar 2 va 1 ochkolik bo‘ladi. Bunda muxlislar ovozi katta ahamiyatga ega bo‘lib, birinchi o‘rinni egallagan nomzod 6, mos ravishda keyingilar 4 va 2 ochkodan qo‘lga kiritadi. Yakunda eng ko‘p ball to‘plaganlar oyning eng yaxshilari sifatida e’tirof etiladi.

 Ortda qolgan mart oyida Coca  Cola  Superliga-2019 start oldi. Superliga doirasida jamoalar 2 ta tur o‘yinlarini o‘tkazishdi. Mazkur uchrashuvlar davomida bir qator darvozabonlar ishonchli o‘yin namoyish etib, muxlis-u mutaxassislar olqishiga sazovor bo‘ldi.

 Mart oyining eng yaxshi darvozabonini aniqlash uchun tashkil etilgan so‘rovnoma yakunlariga ko‘ra, “Dinamo” jamoasi posboni Botirali Ergashev eng ko‘p ochko jamg‘arishga erishdi. 2 ta o‘yinda maydonga chiqib, 4 ta seyv amalga oshirgan ushbu darvozabon qolgan raqobatchilarini ovoz berishda katta farq bilan ortda qoldirishga muvaffaq bo‘ldi. 

Qaysi murabbiy va futbolchi kimga ovoz bergani PFL saytida barcha g‘oliblar ma’lum bo‘lgach e’lon qilinadi.