Хабарингиз бор, Ўзбекистон Профессионал футбол лигаси 2018 йилги мавсумнинг ҳар ойидан кейин тўрт йўналиш бўйича энг яхшиларни аниқлаб келди: энг яхши мураббий, энг яхши футболчи, энг яхши дарвозабон ва энг чиройли гол. Ташкил этилган сўровнома якунларига кўра энг кўп овоз тўплай олган номзодлар ташкилотнинг энг яхшилар учун аталган статуэткаларини қабул қилиб олишди.
2019 йилги мавсумда ҳам мазкур анъанани давом эттирамиз. Энг яхшиларни аниқлаш шартлари ўзгармайди. Суперлиганинг 14 клуби бош мураббийлари ҳамда сардорлари кўрсатилган номзодларни учталикка жойлаштириб чиқади.
Дастлабки ўринда кўрсатилган номзод 3, мос равишда кейинги икки ўриндагилар 2 ва 1 очколик бўлади. Бунда мухлислар овози катта аҳамиятга эга бўлиб, биринчи ўринни эгаллаган номзод 6, мос равишда кейингилар 4 ва 2 очкодан қўлга киритади. Якунда энг кўп балл тўплаганлар ойнинг энг яхшилари сифатида эътироф этилади.
Ортда қолган март ойида Coca Cola Суперлига-2019 старт олди. Суперлига доирасида жамоалар 2 та тур ўйинларини ўтказишди. Мазкур учрашувлар давомида бир қатор дарвозабонлар ишончли ўйин намойиш этиб, мухлис-у мутахассислар олқишига сазовор бўлди.
Март ойининг энг яхши дарвозабонини аниқлаш учун ташкил этилган сўровнома якунларига кўра, “Динамо” жамоаси посбони Ботирали Эргашев энг кўп очко жамғаришга эришди. 2 та ўйинда майдонга чиқиб, 4 та сейв амалга оширган ушбу дарвозабон қолган рақобатчиларини овоз беришда катта фарқ билан ортда қолдиришга муваффақ бўлди.
Қайси мураббий ва футболчи кимга овоз бергани ПФЛ сайтида барча ғолиблар маълум бўлгач эълон қилинади.
