Xabaringiz bor,ertaga Superliganing 5-turida“Andijon” o‘zida Qarshining “Nasaf” jamoasini qabul qiladi.
Bu “Andijon”ning joriy mavsum “Sog‘lom Avlod”dagi ilk uchrashuvi bo‘ladi. Uchrashuv oldidan “burgutlar” yarim himoyachisi Asror G‘ofurov fikrlari bilan qiziqdik.
- Assalomu alaykum, Asror aka “Nasaf”ga qarshi tayyorgarliklar qay darajada o‘tmoqda, futbolchilarning kayfiyati qanday?
- Tayyorgarliklar avjida. Nasib qilsa, o‘z maydonimizda g‘alaba qozonib muxlislarimizni xursand qilamiz. Ertangi o‘yinda g‘alaba qozonishimiz shart. Bu o‘yinni butun Andijon kutyapti.
- To‘rtta o‘yindan buyon "Andijon" g‘alaba nimaligini bilmay kelmoqda. Mavsum avvalida jamoaning maqsadlari jiddiyligi haqida bong urilgandi.
- Barchasi yaxshi faqat ohirgi to‘rtta o‘yinning barchasini safarda o‘tkazdik. Mehmonda o‘ynash har doim qiyin. Endi o‘z maydonimizda o‘ynashni boshlaymiz va albatta g‘alaba qozonishni ham.
- So‘nggi turda safarda "Bunyodkor"ning ancha yosh tarkibiga mag‘lub bo‘ldinglar. "Bunyodkor"ni mag‘lub etishda sizlarga nima yetishmadi?
- Bizga bu o‘yinda omad yetishmadi. Omad kelmasa, qiyin ekan...
- Agar jamoa g‘alaba qozona olmasa, albatta barcha ayb jamoa murabbiyiga yuklatiladi. Eldor Sakayevning ehtimoliy iste’fosi haqida fikringiz.
- Bu haqida hech narsa deya olmayman. Murabbiyni ohirigacha qo‘llab-quvvatlaymiz.
