Coca Cola Superliganing 5-turidan o‘rin olgan «AGMK» - «Bunyodkor» uchrashuvidan keyin o‘tkazilgan matbuot anjumanida dastlab mehmonlar bosh murabbiyi Vadim Abramov va bellashuvning eng yaxshi o‘yinchisi Lutfulla To‘rayev ishtirok etdi.

Vadim Abramov: - Bugun ikkala jamoa ham yutishni xohladi. Fikrimcha, o‘yin muxlislarga yoqdi. Jamoa yomg‘irda ham o‘ynashni bilishi kerak. Bugungi yomg‘ir o‘yinimizga ta’sir qilgani yo‘q, shunchaki, maydon chimining sal balandligi sezildi. Lekin shu balandlik ham o‘yinning tezligini oshishiga xizmat qildi. Aytmoqchimanki, yomg‘ir futbolchilarga halaqit bergani yo‘q.

Jamoa o‘yinini topdimi? Biz hali o‘z maydonimizda o‘ynamadik. Keyingi ikki turni ham safarda o‘tkazamiz. O‘z maydonimizda o‘ynashimiz ham muhim ahamiyat kasb etadi. Albatta, ochkolar yig‘ayotganimiz kishini xursand qiladi. Shunisi aniqki, bolalar natija ko‘rsatish uchun bor imkokoniyatini ishga solmoqda. Harakatdan to‘xtashmayapti.
Zuhurov tajribali darvozabon. Unga alohida rahmat! U o‘zining bosiqligi bilan jamoaga ishonch bag‘ishlab turdi. Keyingi uchrashuvlarda ham shunday o‘ynashini tilayman.

Lutfulla To‘rayev: - Barcha o‘yinni ko‘rdi. Ikkala jamoada ham darvozani ishg‘ol qilish uchun imkoniyat bo‘ldi, biz gol ura oldik. Maydon nam bo‘lgani bahs tempini pasayishiga ta’sir qilmadi, aksincha yomg‘irda o‘yin tezlashadi. Qolaversa, ob-havo ham a’lo darajada edi. G‘alaba qozonganimizdan xursandmiz. «AGMK»ga navbatdagi bahslarda omad tilayman!