Coca Cola Суперлиганинг 5-туридан ўрин олган «АГМК» - «Бунёдкор» учрашувидан кейин ўтказилган матбуот анжуманида дастлаб меҳмонлар бош мураббийи Вадим Абрамов ва беллашувнинг энг яхши ўйинчиси Лутфулла Тўраев иштирок этди.

Вадим Абрамов: - Бугун иккала жамоа ҳам ютишни хоҳлади. Фикримча, ўйин мухлисларга ёқди. Жамоа ёмғирда ҳам ўйнашни билиши керак. Бугунги ёмғир ўйинимизга таъсир қилгани йўқ, шунчаки, майдон чимининг сал баландлиги сезилди. Лекин шу баландлик ҳам ўйиннинг тезлигини ошишига хизмат қилди. Айтмоқчиманки, ёмғир футболчиларга ҳалақит бергани йўқ.

Жамоа ўйинини топдими? Биз ҳали ўз майдонимизда ўйнамадик. Кейинги икки турни ҳам сафарда ўтказамиз. Ўз майдонимизда ўйнашимиз ҳам муҳим аҳамият касб этади. Албатта, очколар йиғаётганимиз кишини хурсанд қилади. Шуниси аниқки, болалар натижа кўрсатиш учун бор имкокониятини ишга солмоқда. Ҳаракатдан тўхташмаяпти.
Зуҳуров тажрибали дарвозабон. Унга алоҳида раҳмат! У ўзининг босиқлиги билан жамоага ишонч бағишлаб турди. Кейинги учрашувларда ҳам шундай ўйнашини тилайман.

Лутфулла Тўраев: - Барча ўйинни кўрди. Иккала жамоада ҳам дарвозани ишғол қилиш учун имконият бўлди, биз гол ура олдик. Майдон нам бўлгани баҳс темпини пасайишига таъсир қилмади, аксинча ёмғирда ўйин тезлашади. Қолаверса, об-ҳаво ҳам аъло даражада эди. Ғалаба қозонганимиздан хурсандмиз. «АГМК»га навбатдаги баҳсларда омад тилайман!