Bugun ham Toshkent viloyatining Bo‘stonliq tumani tog‘ yonbag‘rlarida sharros yomg‘ir yog‘ishiga qaramay veloshosse bo‘yicha 39-Osiyo chempionatining musobaqalari qizg‘in davom etmoqda.
24 aprel kunining ilk musobaqalari 20 yoshgacha bo‘lgan qizlar o‘rtasida o‘tkazildi. Unda velosportchi qizlar g‘oliblik uchun 20 km masofani bosib o‘tishlari lozim edi. Bahor fasliga xos o‘zgaruvchan ob havo injiqliklariga qaramay sportchilar marra tomon yo‘l oldilar. Finishga birinchi bo‘lib qozog‘istonlik sportchi Ulyana Suxorebrik yetib kelgan bo‘lsa undan atigi 6 soniya ortda qolib hamyurtimiz Yanina Kuskova keldi. Uchinchi o‘rin esa Gonkongdan tashrif buyurgan sportchiga nasib etdi. Kumush medali sohibiga aylangan hamyurtimiz O‘zbekiston terma jamoasiga ilk medalni olib keldi.
Bugun kun davomida o‘g‘il bolalar va yigitlar o‘rtasida va U-23 erkaklar o‘rtasida ham individual poygalar o‘tkaziladi. Eslatib o‘tamiz, veloshosse bo‘yicha 39-Osiyo chempionatining musobaqalarida 40 dan ortiq mamlakatdan 600 nafar sportchi ishtirok etmoqda. Musobaqalar UzReport TV telekanali to‘g‘ridan to‘g‘ri efirlarda uzatilmoqda.