Бугун ҳам Тошкент вилоятининг Бўстонлиқ тумани тоғ ёнбағрларида шаррос ёмғир ёғишига қарамай велошоссе бўйича 39-Осиё чемпионатининг мусобақалари қизғин давом этмоқда.

24 апрель кунининг илк мусобақалари 20 ёшгача бўлган қизлар ўртасида ўтказилди. Унда велоспортчи қизлар ғолиблик учун 20 км масофани босиб ўтишлари лозим эди. Баҳор фаслига хос ўзгарувчан об ҳаво инжиқликларига қарамай спортчилар марра томон йўл олдилар. Финишга биринчи бўлиб қозоғистонлик спортчи Уляна Сухоребрик етиб келган бўлса ундан атиги 6 сония ортда қолиб ҳамюртимиз Янина Кускова келди. Учинчи ўрин эса Гонконгдан ташриф буюрган спортчига насиб этди. Кумуш медали соҳибига айланган ҳамюртимиз Ўзбекистон терма жамоасига илк медални олиб келди.

Бугун кун давомида ўғил болалар ва йигитлар ўртасида ва U-23 эркаклар ўртасида ҳам индивидуал пойгалар ўтказилади. Эслатиб ўтамиз, велошоссе бўйича 39-Осиё чемпионатининг мусобақаларида 40 дан ортиқ мамлакатдан 600 нафар спортчи иштирок этмоқда. Мусобақалар УзРепорт ТВ телеканали тўғридан тўғри эфирларда узатилмоқда.