Bugun, 1 may kuni Qarshi shahridagi ixtisoslashtirilgan olimpiya zaxiralari maktab-internatida Prezidentimiz tomonidan ilgari surilgan 5 ta muhim tashabbusdan ikkinchi bo‘lgan yoshlarni jismoniy chiniqtirish, ularning sport sohasida qobiliyatini namoyon qilishi uchun zarur sharoit yaratish bo‘yicha ishlarni jadallashtirish hamda Vazirlar Mahkamasining 2019 yil 15 apreldagi "2019 yil may oyining “Sport oyligi” deb e’lon qilinishi hamda sport tadbirlarini o‘tkazish to‘g‘risida"gi yig‘ilishi bayoni ijrosini ta’minlash maqsadida sport festivali o‘tkazildi va viloyatda bir oy davomida o‘tkaziladigan sport musobaqalariga start berildi. 

Ishtirokchilar va muhlislar qiziqishi ostida boshlangan tadbirda Qashqadaryo viloyati jismoniy tarbiya va sport boshqarmasi boshlig‘i Sirojiddin Odilov so‘zga chiqib, yurtimizda sport sohasida amalga oshirilayotgan islohotlar, qabul qilingan qaror va qonunlar, ularning viloyatdagi ijrosi, eng yuqori natija ko‘rsatgan sportchilarning yutuqlari bilan barchani tanishtirib, tadbirni ochiq deb e’lon qildi.

Shundan so‘ng har bir sport turi bo‘yicha mahoratli yoshlar musiqa sadolari ostida o‘zlarining ko‘rgazmali chiqishlarini namoyish etishdi. Festivalda viloyatda faoliyat olib borayotgan 36 ta sport federasiya (assosiasiya)lari mutasaddilari, viloyatdagi ta’lim muassasalarining 2000 ga yaqin o‘quvchilari ishtirok etishdi.