Бугун, 1 май куни Қарши шаҳридаги ихтисослаштирилган олимпия захиралари мактаб-интернатида Президентимиз томонидан илгари сурилган 5 та муҳим ташаббусдан иккинчи бўлган ёшларни жисмоний чиниқтириш, уларнинг спорт соҳасида қобилиятини намоён қилиши учун зарур шароит яратиш бўйича ишларни жадаллаштириш ҳамда Вазирлар Маҳкамасининг 2019 йил 15 апрелдаги "2019 йил май ойининг “Спорт ойлиги” деб эълон қилиниши ҳамда спорт тадбирларини ўтказиш тўғрисида"ги йиғилиши баёни ижросини таъминлаш мақсадида спорт фестивали ўтказилди ва вилоятда бир ой давомида ўтказиладиган спорт мусобақаларига старт берилди.
Иштирокчилар ва муҳлислар қизиқиши остида бошланган тадбирда Қашқадарё вилояти жисмоний тарбия ва спорт бошқармаси бошлиғи Сирожиддин Одилов сўзга чиқиб, юртимизда спорт соҳасида амалга оширилаётган ислоҳотлар, қабул қилинган қарор ва қонунлар, уларнинг вилоятдаги ижроси, энг юқори натижа кўрсатган спортчиларнинг ютуқлари билан барчани таништириб, тадбирни очиқ деб эълон қилди.
Шундан сўнг ҳар бир спорт тури бўйича маҳоратли ёшлар мусиқа садолари остида ўзларининг кўргазмали чиқишларини намойиш этишди. Фестивалда вилоятда фаолият олиб бораётган 36 та спорт федерация (ассоциация)лари мутасаддилари, вилоятдаги таълим муассасаларининг 2000 га яқин ўқувчилари иштирок этишди.
