Yaqinginada mamlakatimiz ot sporti bo‘yicha nufuzli musobaqa – “FEI Jumping Children`s Classic Final-2019” xalqaro bolalar kubogining final bosqichiga mezbonlik qilgandi.   Oradan hech qancha vaqt o‘tmay Toshkent viloyati Bo‘stonliq tumanidagi “Allyur” ot sporti klubida yana bir yirik halqaro musobaqa tashkil etildi. Bu ham bo‘lsa Xalqaro ot sporti federasiyasining O‘zbekistonga bo‘lgan yuksak ishonchidan nishona.   Ot sportining konkur yo‘nalishi bo‘yicha o‘tkazilgan an’anaviy jahon kubogi bosqichi Markaziy Osiyo mintaqasi saralash bahslarida bu safar ham yurtimiz chavandozlari bilan bir qatorda qo‘shni Qozog‘iston va qirg‘izistonlik chavandozlar g‘oliblik uchun bahs olib bordi.   Uch kun davom etgan musobaqalarda hamyurtlarimiz o‘zlariga bildirilgan ishonchni to‘la oqladi, deyishga asoslar yetarli. Zotan, uch kun davomida ham o‘zbekistonlik chavandozlar o‘z muxlislarini xushnud etishdi, faqat Millatlar kubogi musobaqasi bundan mustasno.     Darvoqe, jahon kubogi bosqichi doirasida o‘tkazilgan Millatlar kubogi bahslarida bu safar Markaziy Osiyoning doimiy uch vakilidan tashqari Belorus hamda Rossiyadan ham yosh va iqtidorli sportchilar o‘z omadini sinab ko‘rdi. Mazkur yo‘nalishdagi musobaqalarda yurtimiz sharafini Xurshid Olimjonov, Feruz Abdullayev, Bekzod Qurbonov hamda umidli sportchimiz Saidamirxon Turg‘unboyevlar himoya qildi. Keskin va murosasiz kechgan bellashuvlarda omad bu safar Qirg‘iziston terma jamoasi a’zolariga kulib boqdi. Biznikilar ikkinchi, Qozog‘iston terma jamoasi esa 3-o‘rinni qo‘lga kiritdi. Rossiya va Belorus vakillarining esa yurtimizga tashrifi omadsiz chiqdi.    Ammo, ushbu yo‘nalishda munosib qatnashgan 18 yoshli chavandozimiz S.Turg‘unboyev Xalqaro toifadagi sport ustasi talabini bajardi. Bundan ko‘rish mumkinki, o‘zbek ot sportining ertasi ishonchli qo‘llarda.   Jahon kubogi bosqichining Gran-pri musobaqalari ham o‘ta murosasiz kechdi. Unda omad hamyurtimiz Bekzod Qurbonovga nasib etdi. Terma jamoamiz sardori va o‘zbek ot sporti faxri bo‘lmish G‘ayrat Nazarov esa kumush medalga sazovor bo‘ldi. Qirg‘izistonlik mashhur sportchi Kamil Sabitov bronza medalini qo‘lga kiritdi.   Ot sporti bo‘yicha jahon kubogining Markaziy Osiyo mintaqasi ikkinchi bosqichiga 24-26 may kunlari Qirg‘izistonning Bishkek shahri mezbonlik qiladi. Hal qiluvchi uchinchi bosqich bellashuvlari esa Osiyo chempionati hamda olimpiada saralash turnirlari yaqinlashib qolgani sababli kuz fasliga, aniqrog‘i sentyabr oyiga qoldirildi. Eslatib o‘tamiz, jahon kubogining Markaziy Osiyo mintaqasi saralash bahslari uchta bosqichda tashkil etiladi. Barcha bosqichlarda maksimal yuqori natija qayd etgan chavandoz va oti jahon kubogining final bosqichiga yo‘llanmani qo‘lga kiritadi.