“Barselona” va Ispaniya terma jamoasining sobiq futbolchisi Xavi joriy mavsum tugaganidan so‘ng faoliyatini tugatishi haqida ma’lum qildi. 

“39 yoshga to‘lgunimga qadar futbol o‘ynash men uchun sharafli ish edi va endi mavsumni ko‘tarinki ruhda tugatmoqchiman. 

Bu mavsum futbolchi sifatida men uchun eng so‘nggisi, lekin murabbiylik faoliyatida nima bo‘lishini sabrsizlik bilan kutyapman. 

Mening murabbiylik falsafam o‘ziga yarasha uslubga ega. Biz bunday usullarni Yoxan Kroyff va La Massiya qo‘l ostida bir necha yil davomida misqollab yig‘ib kelganmiz. Menga ko‘proq maydonda shiddat bilan va hujumga ko‘proq o‘tadigan jamoa shakllantirish yoqadi”, - deydi Xavi.

Ma’lumot o‘rnida, Xavi faoliyatining ko‘p qismini “Barselona” o‘tkazgan (767 ta o‘yin). 

2015 yildan boshlab u Qatarning “Al Sadd” jamoasida o‘ynab kelmoqda. 2000 yildan boshlab 2014 yilga qadar u Ispaniya terma jamoasi safini himoya qilgan va 133 ta o‘yin o‘tkazgan.

“Barselona” bilan Xavi sakkiz karra Ispaniya chempioni, uch marotaba mamlakat kubogini va olti marta Superkubokni qo‘lga kiritgan. Shuningdek Xavi to‘rt karra chempionlar ligasi sohibi. Yana u ikki marta UYEFA Superkubogini va klublar o‘rtasidagi jahon chempionatini qo‘lga kiritgan. 

Ispaniya safida Xavi 2010 yil jahon chempioni bo‘lgan, 2008 va 2012 yillar esa Yevropa chempionatida zafar quchgan.