"Persepolis" bilan Toshkentdagi bellashuvdan so‘ng Shota Arveladze matbuot anjumanida ishtirok etdi.

- Kutilganidek juda qiyin o‘yin bo‘ldi. "Persepolis" raqibga o‘yin bermaydi va juda yaxshi pressingni amalga oshiradi. Shuningdek, qarshi hujumda xavfli o‘ynaydi. Birinchi bo‘limda o‘yin o‘zgarib turdi. Ba’zan biz ularga o‘ynash imkoniyatini taqdim etgan bo‘lsak, ba’zan ular bizga bunday imkoniyat berishdi. Lekin ikkinchi bo‘limda ancha yaxshi o‘ynadik.

Tanaffusdan keyin o‘yin tizginini qo‘lga oldik  va haqli ravishda g‘alabaga erishdik.  Ko‘plab vaziyatlar yaratdik, raqibga nisbatan faol bo‘ldik. Ikkinchi bo‘limda jamoamiz g‘alabaga ko‘proq loyiqligini isbotladi. Juda muhim va qiyin g‘alabani tantana qildik. Bu bilan barcha o‘zbek futboli muxlislari, Ramazon oyining ilk kunidayoq bizni qo‘llab-quvvatlash uchun kelgan ishqibozlar, ekran qarshisida bizga omad tilagan muxlislar, klub xodimlari, rahbariyat hamda futbolchilarni tabriklayman.

Igor Sergeev uzoq kutilgan golni urdi, degan fikrga qo‘shilmayman. Chunki Sergeev "Lokomotiv" bilan bo‘lgan bahsda ham jamoamiz uchun muhim golni kiritgandi. Zaxiradan uni maydonga tushirguncha hech qanday sehrli so‘zlarni ishlatganim yo‘q. Maydonga tushishidan avval unga o‘zingni vaziyatingni kut va undan foydalan deb uqtirdim. Jamoamiz uchun navbatdagi muhim golni urganidan xursandmiz.

Sidiqovning jarohati kutilmaganda ruy berdi. Jamoamizda bir-birini o‘rnini to‘ldiradigan futbolchilar mavjud. Sobit uchun bugun ushbu musobaqada debyut bo‘ldi. O‘yinga yaxshi qo‘shildi. U o‘tgan haftada "Paxtakor" safida chempionatda debyutini nishonlagandi. Bugun esa Chempionlar Ligasida maydonga tushdi. Shunday o‘yinlar orqali Sindarov kerakli tajribani to‘playdi.