O‘zbekiston futbol assosiasiyasi yurtimizda futbolni ommalashtirish, bolalar futbolini rivojlantirish, terma jamoalarimizga munosib nomzodlarni yetkazib berish maqsadida turli chora-tadbirlarni amalga oshirmoqda.   Yurtimizdagi iste’dodli bolalarni futbol bilan muntazam shug‘ullanishlarini ta’minlash, yosh futbolchilarning saviyasini o‘stirib borish, yangi iste’dodlarni kashf qilish maqsadida, O‘zbekiston futbol assosiasiyasi “Milliy” stadionida bolalar uchun futbol to‘garaklari tashkil etgani haqida xabar berib o‘tgandik.   O‘FA tomonidan ishga jalb qilingan malakali va tajribali murabbiylar o‘zlari ishlab chiqqan qo‘llanmalar asosida ushbu futbol to‘garaklarida bolalarga futbol sir-asrorlarini o‘rgatib borishmoqda.      Ushbu to‘garaklarda nazariy va amaliy mashg‘ulotlar o‘tkazish va yosh futbolchilarning mahoratlarini sayqallab borish uchun barcha shart-sharoitlar yaratilgan bo‘lib, mashg‘ulotlar haftasiga 3 marta o‘tkaziladi. Futbol to‘garaklariga 6-12 yoshdagi bolalar qabul qilinadi. Har bir bola o‘z yosh toifasidagi tengdoshlari bilan mashg‘ulotlarda qatnashadi.   O‘z farzandini mazkur futbol to‘garagiga bermoqchi bo‘lgan ota-onalar quyidagi manzulga murojaat qilishlari mumkin:   Manzil: Toshkent sh., Bunyodkor ko‘chasi, 47, "Milliy" stadioni  Telefon: +998 99 8006384