G‘arb mintaqasida Osiyo chempionlar ligasining guruh bosqichiga yakun yasaldi. Afsuski, ushbu mavsumda ishtirok etgan O‘zbekistonning ikki klubi pley-off bosqichiga chiqa olmadi. Natijada, OCHLning 2021-2022 yilgi mavsumi uchun beriladigan kvotalarimiz soni kamaydi.

So‘nggi tur oldidan O‘zbekiston OFK koeffisiyentlar jadvalining G‘arb mintaqasida 6-o‘rinni egallab turgan edi. Bu pog‘ona bizga bor-yo‘g‘i "1+1" ko‘rinishidagi kvotani taqdim etar edi. Buni "1+2" ko‘rinishiga keltirish uchun esa 5-o‘rindagi Iroqdan o‘tib ketish talab etilar edi. Guruhning 6-tur o‘yinlari oldidan ikki mamlakat o‘rtasidagi farq 1 ballni tashkil qilayotgan edi.

O‘zbekistonga eng ko‘p ochko keltirishi mumkin bo‘lgan "Paxtakor", afsuski, Saudiya klubiga yutqazdi. Agar "sherlar" ijobiy natijani qayd etishganida, keyingi bosqichga chiqqani uchun qo‘shimcha 3 ballga ega bo‘lar edik.

"Lokomotiv" g‘alaba qozonib, O‘zbekiston uchun 1,5 ballni taqdim etdi. "Az-Zavra"ning o‘yinidan oldin jadvalda Iroqdan o‘tib ketdik. Ammo "Zavra" kecha tunda o‘z maydonida BAAning "Al-Vasl" klubini mag‘lub etdi (5:1). Natijada guruh bosqichida Iroqning faqat bitta jamoasi ishtirok etayotgani bois, bu mamlakat hisobi 3 ballga boyidi va O‘zbekistondan o‘tib ketdi.

"Az-Zavra" ham guruhda qolib ketgani uchun Iroq va O‘zbekiston uchun OCHLning ushbu mavsumi yakunlandi. So‘nggi 4 yilda Iroq klublari 35.7 ball to‘plashgan bo‘lsa, o‘zbek jamoalari 33,2 ball jamg‘arishdi.

Natijada O‘zbekiston koeffisintlar jadvalining G‘arb mintaqasida 6-o‘rinda qoldi va 2021-2022 yillarda "1+1" kvota bilan OCHLda ishtirok etamiz. Kelasi mavsumda esa O‘zbekistonga ajratilgan "1+2"ta o‘rin qoladi.