UYEFA millatlar ligasining final bosqichi start oldi. Dastlabki yarim finalda Portugaliya va Shveysariya terma jamoalari to‘qnash kelishdi.

Birinchi bo‘limda Krishtianu Ronaldu aniq zarba bilan mezbonlarni hisobda oldinga olib chiqdi. Ikkinchi bo‘limda esa Portugaliya darvozasi tomon penalti qiziq belgilandi. Gap shundaki, hakam Feliks Brix VAR orqali Shveysariya darvozasi tomon penalti belgilash kerakmi yoki yo‘qmi degan masalani ko‘rayotib, biryo‘la biroz avval Portugaliya jarima maydonchasida ro‘y bergan qoidabuzarlikni ham ko‘rib chiqdi. Natijaja referi portugaliyaliklar darvozasi tomon penalti belgiladi. Rikardo Rodriges 11 metrli jarima zarbasini aniq amalga oshirib, hisobni tenglashtirdi.

O‘yin tugashi arafasida esa Ronaldu o‘yin taqdirini hal qildi. Dastlab u 11 metrli jarima nuqtasi atrofida zarba berib, jamoasini hisobda oldinga olib chiqdi. Shveysariya terma jamoasi darvozaboni yaqin burchakdan to‘pni o‘tkazib yubordi. Krishtianu qarshi hujum paytida yana bir marta o‘z mahoratini namoyish qildi va o‘yin taqdirini hal qildi — 3:1.

Portugaliya finalda Gollandiya-Angliya juftligi g‘olibi bilan bahs olib borsa, shveysariyaliklar 3-o‘rin uchun o‘yinda ishtirok etishadi.

UYEFA millatlar ligasi, yarim final
Portugaliya – Shveysariya 3:1 (1:0, 2:1)
Gollar: 1:0 – 25 Ronaldu, 1:1 – 57, penalti Rodriges, 2:1 – 88 Ronaldu, 3:1 – 90 Ronaldu.
Portugaliya – Ruy Patrisiu, Pepe (Fonte, 63), Gerreyru, Nelson Semedu, Diash, Ruben Nevesh, Vilyam Karvalyu, Bernardu Silva, Brunu Fernandesh (Moutinyu, 90), Joau Feliks (Gedesh, 70), Ronaldu.
Shveysariya – Zommer, Sher, Rodriges, Mbabu, Akandji, Jaka, Froyler (Drmich, 89), Suber (Shteffen, 83), Zakariya (Fernandesh, 71), Shakiri, Seferovich.
Ogohlantirishlar: Jaka (66), Sher (68), Shakiri (85).