УЕФА миллатлар лигасининг финал босқичи старт олди. Дастлабки ярим финалда Португалия ва Швейцария терма жамоалари тўқнаш келишди.

Биринчи бўлимда Криштиану Роналду аниқ зарба билан мезбонларни ҳисобда олдинга олиб чиқди. Иккинчи бўлимда эса Португалия дарвозаси томон пенальти қизиқ белгиланди. Гап шундаки, ҳакам Феликс Брих VAR орқали Швейцария дарвозаси томон пенальти белгилаш керакми ёки йўқми деган масалани кўраётиб, бирйўла бироз аввал Португалия жарима майдончасида рўй берган қоидабузарликни ҳам кўриб чиқди. Натижажа рефери португалияликлар дарвозаси томон пенальти белгилади. Рикардо Родригес 11 метрли жарима зарбасини аниқ амалга ошириб, ҳисобни тенглаштирди.

Ўйин тугаши арафасида эса Роналду ўйин тақдирини ҳал қилди. Дастлаб у 11 метрли жарима нуқтаси атрофида зарба бериб, жамоасини ҳисобда олдинга олиб чиқди. Швейцария терма жамоаси дарвозабони яқин бурчакдан тўпни ўтказиб юборди. Криштиану қарши ҳужум пайтида яна бир марта ўз маҳоратини намойиш қилди ва ўйин тақдирини ҳал қилди — 3:1.

Португалия финалда Голландия-Англия жуфтлиги ғолиби билан баҳс олиб борса, швейцарияликлар 3-ўрин учун ўйинда иштирок этишади.

УЕФА миллатлар лигаси, ярим финал
Португалия – Швейцария 3:1 (1:0, 2:1)
Голлар: 1:0 – 25 Роналду, 1:1 – 57, пенальти Родригес, 2:1 – 88 Роналду, 3:1 – 90 Роналду.
Португалия – Руй Патрисиу, Пепе (Фонте, 63), Геррейру, Нелсон Семеду, Диаш, Рубен Невеш, Вильям Карвалью, Бернарду Силва, Бруну Фернандеш (Моутинью, 90), Жоау Феликс (Гедеш, 70), Роналду.
Швейцария – Зоммер, Шер, Родригес, Мбабу, Аканджи, Жака, Фройлер (Дрмич, 89), Цубер (Штеффен, 83), Закария (Фернандеш, 71), Шакири, Сеферович.
Огоҳлантиришлар: Жака (66), Шер (68), Шакири (85).