Ertaga bo‘lib o‘tadigan O‘zbekiston – KXDR terma jamoalari o‘rtasidagi o‘rtoqlik o‘yini oldidan matbuot anjumani tashkil qilindi. Matbuot anjumanining birinchi qismida mehmonlar bosh murabbiyi Yun Chon Su ishtirok etdi.  

“Biz Osiyo Kubogidan keyin tarkibdagi ko‘p futbolchilarni almashtirdik. Jamoani yangitdan barpo qilyapmiz. O‘zbekistonga qarshi o‘yinga faqat mahalliy futbolchilarni olib keldik. Legionerlarni bu o‘yinga chaqirmadik. Biz o‘rtoqlik o‘yinlari orqali yangi futbolchilarni sinab ko‘rmoqchimiz.   

To‘g‘ri, Osiyo Kubogidan keyin birorta o‘yin o‘tkazganimiz yo‘q. Sababi yuqorida ta’kidlab o‘tganimdek, jamoada avlodlar almashuvi ketmoqda. Shu sababli jamoa asosini yig‘ib olguncha o‘rtoqlik o‘yinlari tashkil qilmadik.  

Ertaga yangilanayotgan jamoa bilan o‘yin o‘tkazamiz. Maqsadimiz Jahon chempionati saralashida muvaffaqiyatli ishtirok etish. Ertaga biz uchun natija muhim emas. Biz ko‘proq o‘yinimizni shakllantirish ustida ish olib boramiz. O‘z oldimizga qo‘ygan vazifani uddalash uchun qo‘limizdan kelgancha harakat qilamiz”, - dedi Yun Chon Su.