UYEFA millatlar ligasining final bosqichida 3-o‘rin uchun o‘yin bo‘lib o‘tdi. Shveysariya va Angliya terma jamoalari o‘rtasidagi o‘yinning asosiy va qo‘shimcha bo‘limlarida hisob ochilmadi.

Darvoqe, uchrashuvning 83-daqiqasida Uilson raqib darvozasini ishg‘ol qilib, britaniyaliklarni hisobda oldinga olib chiqqan edi. Ammo hakam vaziyatni qaytadan ko‘rganidan keyin golni bekor qildi. Boisi, futbolchi gol urishidan oldin himoyachini tortib yiqitgan edi.

Penaltilar seriyasida esa omad inglizlarga kulib boqdi. Dastlabki besh martadan berilgan zarbalarning barchasi golga aylandi. Jamoasining beshinchi zarbasini golga aylantirgan Angliya terma jamoasi posboni Jordan Pikford, Shveysariyaning oltinchi zarbasini qaytardi. Natijada Angliya termasi UYEFA millatlar ligasining bronza medalini qo‘lga kiritdi.

UYEFA Millatlar ligasi, 3-o‘rin uchun o‘yin
Shveysariya – Angliya - 0:0. Penaltilar bo‘yicha — 5:6
Shveysariya – Zommer, Sher, Akanji, Rodriges (Drmich, 87), Elvedi, Fernandesh (Zakariya, 61), Froyler, Shakiri (Suber, 65), Jaka, Mbabu, Seferovich (Okafor, 113).
Angliya – Pikford, Maguayr, Gomes, Rouz (Uoker, 70), Delf (Barkli, 105), Alli, Lingard (Sancho, 105), Sterling, Dayer, Aleksander-Arnold, Keyn (Uilson, 75).
Penaltilar seriyasi:
Maguayr (0:1) — Suber (1:1)
Barkli (1:2) — Jaka (2:2)
Sancho (2:3) — Akanji (3:3)
Sterling (3:4) — Mbabu (4:4)
Pikford (4:5) — Sher (5:5)
Dayer (5:6)  — Drmich (5:6)