11-tur doirasida bo‘lib o‘tgan "Andijon" - "Metallurg" jamoalari o‘rtasidagi uchrashuvdan so‘ng mehmonlar bosh murabbiyi Andrey Shipilov matbuot anjumanida ishtirok etdi.

- Joriy yilda yangi bosh murabbiy bo‘lgan jamoaga ikkinchi marotaba duch kelyapmiz. Shunday bo‘lishiga qaramasdan biz tayyorgarlik ko‘rdik. "Andijon" jamoasining kuchli va kuchsiz tarafini o‘rgandik. 35-37-daqiqalarda keraksiz follarni ishladik. Natijada o‘z darvozamizdan gol o‘tkazib yubordik. Biz birinchi bo‘limda rejadagidek o‘ynay olmadik. Bir qator paslarimiz aniq amalga oshirilmadi. Raqib bizni yaxshi pressingda ushladi. Ikkinchi bo‘limda esa o‘z o‘yinimizni topdik, foydali o‘zgarishni amalga oshirdik. Shu o‘zgarishlar orqali o‘yin suratini o‘zgartirdik. Natijada esa hisobni tenglashtirdik. Biz hisob uchun o‘ynamadik, atayin vaqtni cho‘zmadik, 94-5-daqiqaga o‘ynadik. 2-3 ta yaxshi imkoniyatlarga ega bo‘ldik. O‘ylaymanki, bugungi o‘yin natijasi adolatli bo‘ldi.

- Bugun raqibdan qanday o‘yin kutgandingiz?

- Kuchli pressing kutgandim, Oybek Qilichev tomonidan jarima zarbalari kutgandim, burchak to‘pini o‘yinga kiritilayotganda bo‘ydor futbolchilaridan xavfli vaziyatlar yuzaga keltirishini kutgandim, Bobur Akbarov, Ildar Mamatkazin kabi bosh bilan yaxshi o‘ynay oladigan futbolchilar borligi uchun ulardan xavf kutgandim. Kutganimdek, Mamatkazin gol kiritdi. Qaysi tarafdan xavf kutgan bo‘lsak, o‘sha tarafdan keldi biz kutgan xavf. Ikki taym pressing qo‘llab bo‘lmaydi, bu mening shaxsiy fikrim. Birinchi bo‘limda kuchli pressing qo‘lladi raqiblarimiz, lekin ikkinchi taymda kuchi yetmay qoldi. Shuning uchun bo‘lsa kerak, biz javob to‘pini kiritdik.

- Tarkibingizda mahoratli futbolchilar bor, lekin natija a’lo darajada emas. Bu nima bilan bog‘liq?

- Kecha bir inson bilan 30 minut suhbatlashdim. Uning ham xuddi shunday savoliga javob bergandim. O‘tgan yili bizda yaxshi saviyadagi futbolchilar jamlangandi. Lekin bizning tajribamizga shubha bilan qarashgandi, qo‘pol qilib aytganda, bizni mensishmagandi. Bu yil bo‘lsa 2-3 nafar nomdor futbolchilarni o‘z safimizga qo‘shib olganimizdan so‘ng, bizga ham "Paxtakor", "Lokomotiv", "Nasaf" kabi jamoalargi qarshi tayyorgarlik ko‘rayotgandek tayyorgarlik ko‘rishmoqda.