Coca Cola Superliga 13-tur doirasidagi “Qo‘qon-1912” – “Paxtakor” uchrashuvidan keyingi matbuot anjumanining ikkinchi qismida “Qo‘qon-1912” jamoasi bosh murabbiyi vazifasini bajaruvchisi Azizbek To‘xtaboyev qatnashdi.

- “Paxtakor” jamoasini g‘alaba bilan tabriklayman. Bugun mag‘lubiyatga loyiq emasdik. O‘yin tugashiga 20 soniya qolganida alamli gol o‘tkazib yubordik. “Paxtakor” kabi kuchli jamoalariga qarshi o‘yinlarda bir daqiqa ham xotirjamlikka berilmaslik lozim. “Paxtakor” tarkib jihatidan ham , tajriba bobida ham eng kuchli jamoa. Bugun jamoamizning hamma futbolchilari yaxshi o‘yin namoyish qilishdi. Shahboz Erkinov esa eng yaxshi bo‘ldi deya olaman. Barcha futbolchilarimga o‘yin uchun rahmat aytaman.

“Paxtakor” bilan bo‘lgan oldingi uchrashuvda futbolchilarimiz erkinroq o‘ynashgandi. Liga kubogining saviyasi balki oldingi bahsda o‘z ta’sirini o‘tkazgandir. Uydagi bahslarda o‘yinchilarimiz bosim ostida qolib ketayotgandek.

Muxlislarimizni O‘zbekistonda yetakchilaridan biri sifatida bilaman. Ular bizni doimo qo‘llab-quvvatlab kelishmoqda. Bir so‘z bilan aytganda bugun muxlislik “super” bo‘ldi. Buning uchun ishqibozlarimizga minnatdorchilik izhor etaman.

Oldinda liga kubogi doirasida “Lokomotiv”ga qarshi o‘yin kutib turibdi. Bu o‘yinda asosan yoshlarimiz va zahirada qolayotgan futbolchilarga imkon beramiz.