Osiyo futbol konfederasiyasining Markaziy va Janubiy Osiyo mamlakatlari bo‘yicha rivojlantirish ofiseri Yogesh Desayi O‘zbekiston futbol assosiasiyasiga tashrif buyurdi.

Qit’amiz futbol konfederasiyasi o‘ziga a’zo mamlakatlar assosiasiyalarni har jihatdan qo‘llab-quvvatlash hamda ularni rivojlanishini ta’minlash bo‘yicha turli loyiha va tashabbuslarni muntazam ravishda amalga oshirib boradi. Ravshan Ermatov OFK rivojlantirish ofiseri Yogesh Desayi bilan uchrashdi va assosiasiya faoliyatini yanada samarali yo‘lga qo‘yilishini ta’minlash, milliy futbolimiz saviyasini oshirishga ko‘mak beruvchi turli loyiha va tashabbuslar bilan yaqindan tanishdi. Yogesh Desayi OFK tomonidan amalga oshiriladigan loyihalar haqida batafsil ma’lumot berib, har bir loyihaning mamlakatda futbolning u yoki bu sohasini rivojlantirishda o‘rni qanday bo‘lishiga to‘xtalib o‘tdi.

Ravshan Ermatov ham O‘FA va OFK o‘rtasidagi aloqalar yanada mustahkamlanishi, o‘rtadagi o‘zaro ishonch va hamkorlikning yangi bosqichga olib chiqilishi, Osiyo futbol konfederasiyasi tomonidan amalga oshiriladigan turli tashabbus va loyihalarda O‘zbekiston vakillarining ham muntazam ravishda ishtirok etib borishi milliy futbolimiz ravnaqiga xizmat qilishini alohida qayd etdi.